—
*حوار صحفي *
اجراه؛ سهيل يوسف أبوسعين
*مع: الأستاذ أسامة علي عبدالمجيد – مدير معرض Sudan Construct Show*
*حول: انطلاق المعرض 15-18 يونيو 2026 بأرض المعارض بري*
*1. أ. أسامة علي عبدالمجيد، بدايةً حدثنا عن عودة معرض Sudan Construct Show هذا العام بعد الانقطاع؟*
بسم الله، الحمد لله على عودة المعرض. عودتنا السنة دي برسالة واضحة: “الإعمار بسواعد سودانية”. بعد الظروف المرت بيها الخرطوم، كان لازم نرجع ونقول للعالم إنو قطاع البناء واقف على رجليه. المعرض ما مجرد فعالية، هو خطوة عملية لإعادة الثقة للسوق وإثبات إنو الشركات المحلية قادرة تبني وتعمر بلدها بنفسها.
*2. أ. أسامة علي عبدالمجيد، ما الذي يميز نسخة 2026 عن الدورات السابقة؟*
التميز السنة دي في 3 نقاط:
أولاً: المشاركة محلية 100%، كل العارضين شركات ومصانع سودانية. دايرين ندعم المنتج الوطني.
ثانياً: المعرض مصحوب بـ *حملة إعلامية كبرى* عشان نوصل رسالة “ارجعوا، بلدكم محتاجاكم” لكل مواطن.
ثالثاً: ركزنا على الحلول العملية للإعمار السريع ومواد البناء منخفضة التكلفة عشان تناسب المرحلة الحالية.
*3. من هم الفئات المستهدفة بالزيارة؟ وما الفائدة العائدة عليهم؟*
مستهدفين المهندسين، المقاولين، المطورين العقاريين، الحرفيين، وحتى المواطن العادي الباني بيته. الفائدة إنهم حيلقوا كل شي تحت سقف واحد: مواد بناء، تشطيب، معدات، تقنيات جديدة. والأهم حيلقوا موردين محليين مباشرين بدون وسيط، ودي بتقلل التكلفة 30-40%.
*4. أ. أسامة علي عبدالمجيد، كلمة توجهها لأهل الخرطوم بخصوص “رسالة الإعمار”؟*
رسالتي بسيطة: الخرطوم ما بتتبني بالكلام، بتتبني بسواعدنا. المعرض دا دليل إنو في ناس شغالين وصامدين وما وقفوا. بنقول لكل زول طلع من البلد: تعال شوف، الإعمار بدأ من هنا. وبنقول للمواطن القاعد: انت شريك أساسي، تعال شوف المنتج السوداني وادعمه. *الإعمار بدأ، والدور عليك*.
*5. ما هي تفاصيل الزيارة للمواطنين والإعلام؟*
المعرض في *أرض المعارض ببري – الخرطوم* من *15 إلى 18 يونيو 2026*.
*الافتتاح*: يوم *15 يونيو الساعة 5 مساءً* بحضور رسمي.
*باقي الأيام*: من *12 ظهراً إلى 7 مساءً*.
*الدخول*: مجاناً لكل المواطنين والمهتمين.
وبندعو كل وسائل الإعلام تغطي الافتتاح وتنقل الصورة الحقيقية للإعمار.
*ختاماً*: بنشكر كل الشركات الوطنية الواقفة معانا، وبنعد المواطن بمعرض يليق بتضحياته وصبره
